【理财】揾到钱仍然嗌穷？ 了解三大贫穷属性 针对性学习脱贫
2003年，黄子华系佢嘅《黄子华栋笃笑：冇炭用》入面讲到：“你地一定要读多啲书呀，如果唔系你哋系唔会明白点解你哋会冇嘢做﹗”大家觉得好笑之余，其实子华神讲嘅嘢往往都有大道理喺度。同样，十几年后嘅今日，香港人同样已经走出咗“沙士”同一次又一次嘅金融危机。但系我地嘅生活好似真系冇乜好咗！睇吓面书上嘅新闻，好多人一样系好穷，揾到钱都会穷，点解呀？洗哂啰！揾得多洗得仲多咪会穷啰！唔系咁样？就要细味吓子华神呢句说话，当你想改变现状，第一步就系要知道自己点解会好似而家咁穷。作者：穷一生
穷生点解咁钟意讲啲唔开心嘢？因为幸福就得一种境界，Ｘ街却系每一种Ｘ街嘅情况都有佢自己嘅故事，有趣好多！同样，穷系Ｘ街嘅一种。所以穷都有分几个属性，好似睇中医咁，你了解咗自己系咩底嘅人，先可以对症下药去医。
【贫穷属性一：消费系】
香港最常见，同中医学上嘅湿热人士一样咁多。点解咁讲？因为香港系亚热带海洋性气候，温度高，湿度都高；加上香港人饮食同作息习惯，所以香港人大多都有湿热问题。同理，消费型贫穷同样系受香港环境影响而生。
香港系资本主义社会，消费主导，大家习惯咗以钱去解决生活上嘅问题。饿？外卖啰！朋友见面，一定系宵夜直落啦！啲嘢坏咗咪换过新啰……要使起上嚟，以一个月二万收入左右嘅一般打工仔嚟讲，系咪真系咁足够畀你去用钱解决问题呢？
【治疗方法：美沙酮疗法】 （按图了解）
所谓消费型嘅人其实系上咗瘾！瘾君子大多系意志力薄弱人士，治疗应该由浅入深，了解自己一个月嘅行为模式以及消费习惯，再由你最冇瘾𠮶样嘢开始减，例如：“比起食好嘢，我更加可以忍得到唔‘飞的’”，咁我哋就减咗“飞的”先。
钱方面，我哋可以先定下自己一个月嘅开支预算，先定一个储钱计划，例如月入15K，我一开始要定下月储5K嘅目标。交3K家用，有7K可以用嘅。出粮先交家用，之后把5K转到另一个户口，将𠮶个SAVING（储蓄）户口嘅卡剪咗佢，或将5K用作月供盈富基金投资等等，总之唔可以咁易用到！5K嘅目标要年年增加，做到个人消费开支大约占你收入25%以下为健康。
【贫穷属性二：家贫系】
呢类喺香港都多，2016年统计署报告都话，香港有接近100万贫穷人口，可见低收入家庭系唔少。作为低收入家庭嘅下一代，见住人哋有Daddy（爸爸）畀埋首付，一毕业就开始供楼，而你一出嚟12K一个月，仲畀阿妈迫你一个月交5K家用先够开饭。内心𠮶种无奈穷生系好明白，因为穷生都系家贫型贫穷底。
【治疗方法：化疗】
呢个情况系最难搞，因为呢个型系唯一牵涉到其他人嘅情况。你一定要同家人一齐定下共识，必要时你仲要把持屋企嘅财政。因为呢个型系由上一代是但一部分嘅家人系消费型／穷忙型而衍生出嚟。
你一定要系一个精明而量入为出嘅人先，以化疗比喻系因为当中你一定会同家人意见不合而产生磨擦，系有伤害性，甚至极端情况系会家变的。不过如果你唔解决，只会跨代贫穷下去。要改变一定要硬起心肠，计一计家庭基本生活开支，畀一个紧紧够用嘅家用金额，为屋企同自己日后都累积到财富先得！
【贫穷属性三：穷忙系】
呢种朋友多数系低学历人士，有部分更可能系人生冇乜目标，唔擅长计划嘅一群。低学历低技术自然难以叫价，女生多见于文员，月入低于1万；男生可能系做仓、食肆、超市之类的地方，月入可以万几，但最惨好快见顶，顶薪做到老也可能只有2万多元，而且呢类工大多工时好长，又困身。好快，你嘅圈子就得番同事，眼光也只有舖头以内，没有时间同心力累积财富，就算累积到20万至30万，你都冇知识去好好利用呢笔钱。
【治疗方法：物理治疗】
叫物理治疗系因为低学历人士长时间冇吸收新知识，大脑同身体都对新事物开始有麻痺感觉。要透过进修／转行，一步一步由困身而且低收入的困境走出来。慢慢恢复同外界嘅联系，同吸收新知识、新技术嘅习惯。例如你可以报读语文或专业技能相关课程，考取有关资格。由日日12小时的手动工作，慢慢多用脑去work smart，回复生命嘅灵活性！
【作者简介】穷一生，80后多媒体设计师、《穷家有道》网站主理人及《戒穷》作家。22岁由3万元总资产、12K月薪起步，26岁储到人生第一个100万，30岁再翻数倍，座右铭是“学会掌握理财技能，使我可以‘穷一生’的追逐兴趣”。著有《戒穷》一书分享理财心得。
（本文授权转载自POORLHK，经01职场频道编辑，原文标题为【理财专家不会教你-了解自己穷的属性】）
立即下载《香港01》，紧贴公务员职位空缺、劳工处笋工推介，了解CV、面试致胜技巧！下载网址：https://hk01.app.link/bkbJyY5t4O