如何面对办公室“政治”：忠于立埸即失势？最忌墙头草揾“著数”

近呢个月打开电视或社交媒体，多数都系游行示威或警民冲突嘅画面，你有无谂过呢啲新闻都间接影响紧你仕途？早排听过一个传闻，话投考警察嘅时候其中一条问题系：“如果遇到学生示威者冲击警察防线，你打唔打落去？”系真定假无从稽考。但近年“政治”风气盛，个人立场亦唔多唔少影响紧你职场条路。

作者：诗宁

审查完社交媒体帐户先决定有无Interview？

话说我老板系个非常支持建制嘅人，佢几乎每朝都破口大骂近日嘅游行活动。最近，公司想喺我Team开个新Post，老板叫我同佢一齐In人，点知入房之前佢突然讲咗句：“诗宁，你估会唔会有啲黄丝嚟见工呢？希望唔好请到啲搞搞震嘅人嚟公司啦。”我笑一笑无答佢，因为公司入面本身就已经有唔少同事有参加游行。

见咗两个求职者，都系普普通通唔特别出众，结果见到第三个，佢表达能力清晰，学历同工作经验都好符合个Post嘅要求，我同老板都觉得佢应该系独立处事能力唔错的，请咗返嚟唔使花太多时间教，几钟意佢。点知老板突然问个求职者：“你点睇最近啲游行新闻呀？赞唔赞成警察拉班暴徒？”老板口中“暴徒”二字就已经清楚表明咗自己立场，个求职者碌大对眼望下老板又望下我，两秒之后佢答：“陈生，𠮶班唔系暴徒，系和平表达诉求嘅示威者，反而系警察使用过多不必要嘅暴力。”轮到老板碌大对眼、黑住面咁点点头“嗯”咗一声，然后向HR打咗个眼色，HR就叫求职者返去等消息。

延伸阅读：

同公司性格不合 不如提早分手？求职免中伏心得：见工最紧要八卦

衰老板有样睇！出问题不道歉反埋怨下属 遇“割席”上司如何自处

老板最后无请呢位求职者。但事情仲未完结，如果系上述兜口兜面问政治立场，你都有得自己决定讲真话定瞒天过海，不过经过呢个求职者之后，老板直情叫HR预先睇下每个求职者嘅社交媒体，审查一次先叫人嚟In，无论你系黄定蓝，提提大家记得好好保护帐户私隐。

参与游行即失势？

Jessica同Zoe 两个都系老板爱将，一直势均力敌争得好紧要，老板每遇到疑问，都会分别召见Jessica同Zoe，问完佢哋意见先再作决定。点知6月12日之后，老板就再无叫过Jessica入房。

原因就系Jessica 6月12日请咗假去游行，仲要Send咗相去同事Group分享，结果就畀人出卖，自此老板认定Jessica系滋事份子，好似忘记晒佢对公司付出过咩努力、有过咩成绩…..对手Zoe就轻松上位了。

所以，你可以去做自己认为啱嘅事，但唔一定要打卡畀人知，有啲嘢你付出咗汗水、表达咗心意，唔使太高调。

可以企左企右企中间，但唔好跳来跳去

我相信总有Office出现“支持”同“反对”声音互相争辩的情况，最少双方都系有自己睇法嘅人，而最可恶系𠮶班无立场只睇边面有“著数”就企边面的同事──即系墙头草，例如B君明知老板系蓝丝，就系咁喺老板面前讲最憎人搞事呀、冲击好暴力……但当成班黄丝同事一齐Lunch嘅时候，B君就会话班学生好有毅力呀、遍地开花做得好……

以为咁样买晒两边Sure Win？大家看在眼里唔踢爆你，唔等于全部人都傻的，喺大是大非之下都左摇右摆，第日有重要Project点敢交畀你？有重要职位点敢留畀你？

你不爱政治，政治还是会找上你，平时已经要防“办公室政治”，而家连“社会政治”都入埋Office，避唔到，不如好好了解下新闻，再问下自己想企喺边，遇到唔同人问你取态嘅时候应该点样答比较好吧。