庄子璇经历父亲病危险死　对人生价值观有重大改变：多啲陪屋企人

庄子璇（Hilary）今晚（10/3）现身尖沙咀出席品牌活动。提到现时父亲最新病况，庄子璇接受《香港01》访问时表示：“虽然爸爸而家醒返，但我都唔敢太过掉以轻心，因为当时就系太过掉以轻心，谂住冇乜嘢，点知就收到电话话爸爸要抢救，变咗我而唔敢放得太低。”

庄子璇续指父亲现时精神状态仍未完全康复过来，思绪亦有些混乱：“其实佢系唔知自己点解会喺医院度，我有问佢嚟医院做乜，佢完全系冇印象，但佢就认得我哋。佢只系逻辑上有啲乱，例如佢会同我讲天花板有蛇追紧佢，又或者沉船要人去救佢。（医生有冇话呢个情况会持续多久？）因为医生之前帮佢打过镇定剂，医生就话要睇佢嘅体内镇定剂慢慢消化咗之后，情况就会有改善，但需时几耐先会清醒返就冇讲到。但我哋有心理准备知道佢嘅康复之路会好漫长，同埋佢之后乖唔乖去多做运动，变咗我哋屋企人系要陪佢一段好长嘅时间。”

父亲走出鬼门关，对你有多大的改变？庄子璇表示：“我觉得有啲睇化咗，明白到生命好脆弱，就好似佢前一日同我倾紧偈，但第二日就命危入咗ICU抢救，令我觉得要珍惜当下同人与人之间嘅关系，同埋有啲嘢唔使睇得咁重，同埋人走咗之后根本都带唔走啲乜嘢。之前都好忙，冇乜时间陪屋企人，变咗而家都会抽多啲时间去陪屋企人，同埋陪得佢多咗，自己都谂嘢都多咗，同埋要担起照顾者角色，令自己都成长咗谂嘢都成熟咗。”