【专访】“儿歌天后”唐韦琪为事业至今未婚：系待嫁嘅女儿！

“长腿叔叔你好吗？交出温馨的心是你吗？可否某个季节来伴我，解开牵挂～”这首由儿歌天后唐韦琪（Vikki）主唱的动画《长腿叔叔》主题曲《梦中天使》，相信对80后和90后一定不陌生！近年，像Vikki姐姐一样能歌善舞的儿童节目主持绝对是买少见少，虽然她早于2007年就离开自己一共担任了12年的TVB儿童节目主持岗位，但她多年来都从未离开过小朋友，更为此至今一直未婚。拍摄：叶志明剪接：吴宇峰场地提供：唐韦琪才艺训练中心

现年51岁的Vikki姐姐在1991年获唱片监制许愿及赵增熹赏识，签约宝丽金而加入乐坛，Vikki姐姐忆述往事：“原本公司想打造我成为比较有个性嘅歌手，但冥冥中就注定你就系会有一首卡通片主题曲《梦中天使》，注定你会系儿歌界有一个位置，而又走咗去儿童节目做主持。我喺入面又学咗好多嘢，亦都同谭玉瑛姐姐结缘同认识到一班好好嘅姐姐。但入面真系太多姐姐，我亦都知道自己嘅位置所以就决定自己出去闯一闯，做返自己钟意做嘅嘢。”

唐韦琪离开TVB以6万元创业

由于Vikki姐姐当年担任主持时，亦会利用闲余时间到学校教小朋友才艺，所以在她离开TVB后就投入儿童教育事业：“其实创业一定要有自己本钱，以前我就租人地方，压力唔大，但喺偶然机会下，歌手莫镇贤就将呢个地方承让俾我，咁我就喺度发展，而个业主算系好好，因为佢知道我系做呢啲小朋友嘅嘢，比较正能量，都有体恤我哋嘅压力，当然我哋都要勤力交租，每次差啲差啲又咁啱够交租。（一开始投资咗几多？）其实第一次嘅投资，我攞咗6万蚊，都系交租，投资唔多，开业唔系好多钱，反而守业难啲，因为我哋又要做制作，小朋友表演时嘅人手、台灯声、舞台服装同化妆等等，就变咗制作嘅使费会大啲。呢度所有嘅设备都好似蚂蚁搬家，逐啲逐啲买。其实我都好感恩所有帮助过我嘅贵人，令我可以喺呢个地方可以孕育一班小朋友，薪火相传一啲教育嘅使命。”

为教育不惜抛开艺人身份

教育虽是良心事业，但想教好小朋友绝非易事，Vikki姐姐往往需花上比常人更多时间和努力，除了会自己设计课程去训练小朋友唱歌、跳舞、Catwalk和节奏感外，更不时要化身社会工作者调整小朋友的心态：“好多小朋友6岁嚟学，而家已经17岁，心路历程都好开心。但当然都见到佢哋有挫折，有时会好似社会工作者，要调整佢哋，同家长之间嘅沟通都好紧扣，变咗我已经唔觉得自己系艺人，系社会工作者，系艺术治疗同心灵上多啲。”最近Vikki姐姐更自资协办香港区艺术锦标赛兼初赛评委：“我觉得而家嘅年青人应该要喺艺术修养上付出，要为自己去演出。我发现而家啲人的确系冷漠咗，所以更加想去推动呢个活动，增加人与人之间嘅沟通。”

曾与李天翔传绯闻：佢系一个好好嘅主持！

Vikki姐姐在事业上的发展有目共睹，但感情一直都很神秘，唯一曾与同样是儿童节目主持的李天翔传过绯闻。对此，Vikki姐姐笑言：“其实儿童节目主持个个都有拍过拖，只不过系娱乐新闻记者冇报道！又可能系儿童节目畀人感觉系小朋友嘅嘢，所以都少人问呢啲，你都系第一个问我感情世界嘅嘢！（同李天翔系咪真㗎？）佢系一个好好嘅儿童节目主持，亦都好好嘅演员，𠮶次我咁啱车佢返工就俾人影咗相，佢都好少讲感情事。（你呢？）我都醉心工作，因为我哋以前工作真系好忙。”

否认同性恋传闻：我想同自己平反

Vikki姐姐更笑言多年来都未有追求者：“冇留意就唔觉得有人追，我好钟意自己做自己嘢，可能而家有人追都唔定，但我又冇留意，而且有一种使命感，变咗成日都得学生，家长，学生，家长……（屋企人有冇催你结婚？）屋企人唔催，可能觉得你咁大个就自己决定自己。屋企人都结晒婚，净系得我未结婚。而且有一样嘢我想平反，都唔知点解网上面有人同我讲话我结婚，话我有丈夫，好似14年嘅事，但𠮶阵我搞紧演唱会，忙到甩碌，其实我未嫁，系待嫁嘅女儿。而且有报道话我钟意女仔，其实我同男仔女仔做朋友都好钟意，但话我有同性嘅特质，我就冇啦，都想同自己平反。”

承认与工作伙伴有发展空间：缘份嚟到挡都挡唔住！

Vikki姐姐又笑言没有计算自己至今单身多少年，但就透露：“其实有时同自己工作嘅伙伴，都会有人问我哋系咪拍拖，通常啲人都会咁样谂我哋。（但有冇拍拖？）冇，但都可以有发展空间，咁有时partner…..有时工作有时都会有感情，相处呀，都可以叫拍拖嘅。但呢啲嘢都好随缘，缘份嚟到挡都挡唔住，乐天知命！”

其实Vikki姐姐画画都有一手，点撃下图睇作品！