【深宫计】唐朝酷刑盛行　武则天改良“骨醉”变态过凌迟处死

讲到中国古代酷刑，可能大家都会谂起五马分尸、凌迟处死、腰斩、宫刑等，但系其实呢啲都系小儿科，仲有好多酷刑系恐怖到你估唔到。《宫心计2深宫计》第5集讲到太子妃(胡定欣饰)掌管后宫之后，就决定重建回心院，但回心院就有个传闻就系每逢月圆，死咗嘅萧淑妃就会番嚟怨魂索命。事缘当年萧淑妃被武则天囚禁，先帝经过被囚禁嘅地方时，听到萧淑妃哀嚎而产生怜悯，将该地名为回心院。武则天知道之后大发雷霆，下令将萧淑妃用铁链锁住日夜毒打，再将佢嘅手脚斩断，做成“人彘”。咁究竟咩系“人彘”呢？

其实“人彘”(读音：痔)呢个酷刑就系将人变成猪嘅酷刑，最早喺西汉嘅时候就已经出现，发明“人彘”嘅就系吕后。话说刘邦夺得天下之后，就恋上戚夫人嘅美貌，喺妒忌心作祟之下，就对戚夫人报复。先将戚夫人嘅头发剃光，斩晒啲手手脚脚，挖去双眼，用烟熏耳、服哑药，令戚夫人讲唔到嘢，发出嘅声音就好似猪叫，然后掉佢落屎坑……去到武则天统治年代，就将“人彘”演变成“骨醉”。行刑方法同“人彘”差不多，武则天将萧淑妃做成“人彘”之后，再将萧淑妃放落一个装满酒嘅大缸入面，并将酷刑名为“骨醉”。

唐朝系使用酷刑嘅朝代，原因系武则天在位期间要排除异己，所以就发明不同酷刑，并将酷刑“发扬光大”，仲召集一班人做“酷吏”去研究同施刑，由生性残暴嘅来俊臣做代表。“酷吏”发明嘅酷刑嘅名全部都好好听，例如“仙人献果”，就系将犯人赤裸身体跪喺碎瓦砾，双手捧枷举过头顶，仲有“玉女登梯”，迫犯人爬上高梯，用绳绑住颈并向后拉，令犯人跌死或者窒息而死，但呢啲全部都唔够“骨醉”变态。所以话呢，无毒不丈夫，最毒妇人心，历史都提醒大家千万唔好得罪女人，尤其系有权势嘅女人，如果唔系，你会死得好惨……