【专访】FreshLife搣“Session底” 谢伟伦：夹Band先满足到自己
乐队FreshLife成立了一年多的时间，或许对你仍然有点陌生；但当中主音谢伟伦却是一个较熟悉的名字。也许你也在想，谢伟伦曾参加《中国新声音》，推出过一连串作品，为何毅然转为乐队的姿态进入乐坛？原因很简单，他说：“本身写嘅歌就系为乐队而设，只有夹Band先满足到自己！”摄影：黄宝莹
因为《FreshLife》先有FreshLife
FreshLife成位成员，主音及结他手谢伟伦(Alan)、结他手Vincent、Bass手Logout及鼓手Nick，全部都是“自然熟”，于谢伟伦个人姿态时已有合作，一起踏足不同舞台。直到《FreshLife》一曲出现时，4人合力将Alan的“Rock底”Demo，变成大家现时听到的Groovy、阳光感觉很重的版本。
Alan说：“系《FreshLife》令我哋觉得，点解我哋唔夹Band呀？都一齐花咗咁多心思，夹Band啦，仲搞咩啫！”
夹FreshLife要搣甩“Session底”
Alan现时主要为内地剧集制作配乐及主题曲，而Nick及Logout也有担任Session乐手的工作，他们也认为FreshLife让他们做回自己，能够将自己的想法、音乐喜好、专长呈现在作品之中，不需要再被“定型”。
话虽如此，夹Band初期也需要时间适应，Logout说：“开头夹FreshLife要搣甩‘Session底’，因为以前好多时候歌手嚟到，Band Leader畀谱你就照足弹，冇咩特去构思点样参与呢件事。”Nick补充：“呢个都系我嘅难题，我以前系‘煮到埋嚟就食’𠮶啲，但依家好似个厨师咁，要谂下点样去煮好佢。”
四个人一聚埋就“黐咗线”！
正所谓“夹Band先夹人”，但“夹人”对FreshLife来说根本不是问题，Alan笑言：“我哋四个一聚埋就黐咗线，估唔到咁一拍即合！旁人以为我哋夹咗好耐，其实我哋识咗冇耐㗎咋，只系比《FreshLife》首歌面世耐少少，哈哈！”
四人关系要好，家庭、感情、私事无所不谈，音乐上自然合拍，不过创作方面也需要“互相抗衡”。Alan及Logout可谓乐队中创作的主导，虽然有时会吵得面红耳热，但目的都是为了建构出好作品，Alan说：“有时我想做啲好特别嘅类型，但Logout就会抽离一下去谂，你想啲歌系人哋会明，而唔系净系得自己明㗎嘛！”
谢伟伦被赶出家门 “你继续玩啦，Bye Bye”
为玩音乐你可以去到几尽？Alan曾做过兼职司机，家人极力反对，甚至将他赶出家门，Alan忆述：“佢哋直头同我讲‘你继续玩啦，Bye Bye！’，系去到咁嘅情况！但我谂唔到一个理由唔玩！”
他续说：“我以前系揾到钱，有安稳生活，但唔会得到满足感，我亦唔会返去以前嘅工作。就算依家要挨，但砌完首歌之后个喜悦，系我哋四个人一齐开心！呢行你唔专注玩冇得玩，我又唔系做唔到，点解唔做呢？”
唔出EP，一出就要出大碟！
作品如呈现自己的想法、理念，是一队乐队的重心，FreshLife也不例外。有乐队会先推出EP，慢慢再到大碟，但FreshLife却要一步到位。Alan解释：“听碟最开心嘅地方就系由头听到落尾，会有‘WOW’嘅感觉，系讲紧成个Flow咁去。”Logout补充：“如果出EP，就会变成keep住EP，唔知几时出大碟，到时就会变单曲精选，哈哈！”
Alan希望将自己一路走来的经历化作歌曲，但同时也有点无奈：“虽然玩音乐系好开心，但系又有啲无奈，点解我要做咁多其他嘢去support呢件事，而唔系好专注咁做呢？好似打工买梦想咁！”
即使感到无奈，但FreshLife仍然坚持将最好的元素放进歌曲，Logout透露：“有一首未曝光嘅作品，虽然系情歌，但当中我编咗个弦乐四重奏，系‘真拉鸡’！”Alan说：“因为我哋着重个意境，中间Solo位会有电影配乐嘅感觉。希望听众会有一个置身另一空间嘅感觉，而我哋就喺度建构紧个城市。”